Në 24 orët e fundit nuk janë shënuar raste të reja me grip shpendësh. Kjo është konfirmuar nga Zëvendësministrja e Bujqësisë, Ermira Gjeci, e cila tha se nuk ka raste të reja të identifikimeve me gripin e shpendëve. Ajo shtoi më tej se vijon asgjësimi i shpendëve të prekura dhe shfarosja e tyre. Gjatë një konference për mediat, Ermira Gjeci deklaroi se po punohet që të parandalohet përhapja e gripit të pulave në fermat e tjera. Gjeçi nënvizoi se ushqimet që po tregtohen, nuk kanë rrezik dhe se ato janë të kontrolluara.
“Nuk jemi pasur konfirmime për asnjë rast të ri nga Instituti i Sigurisë. Nuk kemi pasur as denoncime. Në të gjithë territorin e vendit, vazhdon asgjësimi i shpendëve të prekura dhe shfarosja e tyre.
Nga kontrollet e kryera, për monitorim, situata paraqitet e shëndetshme. Nuk ka vatra të tjera të dyshuara. Autoritetet po ushtrojnë kontrolle në territor. Është marrë dhe një vendim, ku do të ketë masa për shitjen e shpendëve dhe kafshëve në mjedise të hapura. Aktualisht nuk jemi asnjë rast të ri të konfirmuar apo ndonjë stabiliment me mish të infektuar”, tha zv.ministrja.
