Një ditë pasi u shpall në kërkim ndërkombëtar, ish-prokurori i Përgjithshëm Adriatik Llalla është vënë në lëvizje. Llalla kërkon pezullim ekzekutimi të vendimit, që e ka dënuar me 2 vite burg për fshehje pasurie.
Çështja është hedhur në short ditën e djeshme dhe pritet të shqyrtohet nga Gjykata e Posaçme. Llalla i dënuar vetëm 3 javë më parë nga GJKKO me 2 vite burgim, ka vënë në lëvizje drejtësinë shqiptare. Kërkesa përmes së cilës kërkon të pezullojë dhe shtyjë ekzekutimin e dënimit me 2 vite burg dhe të mos shkojë prapa hekurave, është bërë për arsye shëndetësore.
Prokuroria e Posaçme kundër Korrupsionit dhe Krimit të Organizuar, shpalli dje në kërkim ndërkombëtar ish-Prokurorin e Përgjithshëm, Adriatik Llalla. Pak ditë më parë, Gjykata e Apelit të Posaçëm la në fuqi vendimin për dënimin me 2 vjet burg të ish-kryeprokurorit Llalla, ndërkohë që po atë ditë Policia e Shtetit shkoi në banesën e ish-kreut të akuzës, por nuk e gjeti aty.
Ka qenë Policia e Tiranës, e cila i është përgjigjur me një shkresë zyrtare Strukturës së Posaçme Kundër Korrupsionit dhe Krimit të Organizuar, ku e informon se ish-kryeprokurori Adriatik Llalla nuk është gjendur. Bëhet me dije se 24 orë pas nisjes së procedurave, SPAK ka dorëzuar dokumentacionin në Interpol, dhe është bërë zyrtarisht shpallja në kërkim ndërkombëtar për Llallën. Sipas informacioneve, mësohet se dokumentacioni i është dorëzuar zyrës së Interpol Tiranës për të nxjerrë në sistem emrin e Llallës, i cili do të jetë në sistemin e personave të kërkuar në të gjitha agjencitë e huaja ligjzbatuese. Dhe sapo të bien në gjurmët e tij, ai do të arrestohet për llogari të shtetit shqiptar.
