Nga: David Spiegelhalter & Anthony Masters “The Guardian”
Një nga titujt e variantit online të së përditshmes “Daily Mail” më 13 qershor ishte: “Një studim tregon se 29 për qind e 42 personave që kanë vdekur pasi u prekën nga varianti i ri i koronavirusit, kishin marrë njërën nga 2 dozat e vaksinës”.
Në konferencën për shtyp për Institutit të Shëndetit Publik të Anglisë (PHE) më darën 25 qershor, kjo shifër ishte rritur në 43 për qind (50 nga 117 persona), me shumicën (60 për qind prej tyre) që kishin marrë të paktën një dozë.
Fakti që shumica e njerëzve që po vdesin aktualisht në Angli me variantin tanimë dominues Delta (B.1.617.2) janë të vaksinuar, mund të tingëllojë shumë shqetësues. A do të thotë kjo se vaksinat janë joefektive? Jo, kjo është saktësisht ajo që do të prisnim nga një vaksinë efektive, por e papërsosur, me një profil rreziku që ndryshon jashtëzakonisht nga mosha dhe mënyra e administrimit të vaksinave.
Merrni parasysh një botë hipotetike, ku që të gjithë do të kishin marrë një vaksinë më pak se të përsosur. Edhe pse shkalla e vdekjeve do të ishte e ulët, të gjithë ata që do të vdisnin do të ishin tërësisht të vaksinuar.
Vaksinat nuk janë perfekte. PHE e vlerëson në 94 për qind efektivitetin e dy dozave të vaksinës në aspektin e shmangies së shtrimit në spital me infeksionin e variantit Delta.
Ne mund të supozojmë se ato garantojnë të paktën 95 për qind mbrojtje kundër vdekjes nga Covid-19, gjë që do të thotë se rreziku vdekjeprurës zvogëlohet në më pak se 1/20 e vlerës së tij të zakonshme.
Por rreziku i vdekjes nga Covid-19 varet shumë edhe nga mosha:ai përgjysmohet për çdo ulje të moshës me 6-7 vite. Kjo do të thotë se dikush që është në moshën 80 vjeç dhe që është plotësisht i vaksinuar, është në thelb po aq i rrezikuar sa një person i pa vaksinuar rreth moshës 50 vjeç.
Shumë më i ulët, por ende jo zero, prandaj ne mund të presim disa vdekje. Raporti i PHE zbulon gjithashtu se gati një e treta e vdekjeve nga varianti Delta, i përkasin personave të pa vaksinuar mbi 50 vjeç, gjë që mund të jetë befasuese duke pasur parasysh mbulimin e lartë me vaksina të popullatës.
Për shembull, Open SAFELY, vlerëson se më shumë se 93 për qind e atyre midis moshës 65-69vjeç janë vaksinuar tashmë. Por gjithsesi ka ende norma më të ulëta të vaksinimit në zonat e privuara dhe për disa etni dhe bashkësi me mbulim të kufizuar, të cilat do të vazhdojnë të përjetojnë më shumë humbje jetësh.
Mbulimi dhe efektiviteti janë shifra shumë të rëndësishme për vlerësimin e programeve të vaksinimit. Është më mirë të lexosh analizat e ftohta të analistëve, sesa ato të nxehta dhe konfuze në mediat sociale dhe mjetet e tjera të informimit.
Burimi i lajmit: https://www.theguardian.com/theobserver/commentisfree/2021/jun/27/why-most-people-who-now-die-with-covid-have-been-vaccinated
Përshtatur nga TIRANA TODAY
