Pirja e kanabisit duket se ndikon në zhvillimin e trurit të adoleshentëve, duke e ndryshuar atë në mënyra që mund ta zvogëlojnë arsyetimin, vendimmarrjen dhe kujtesën e tyre kur të plaken, zbulon një studim i ri.
Skanimet e trurit të rreth 800 adoleshentëve, zbuluan se ata që nisnin pirjen e kanabisit kishin tendencë të përjetonin një tkurrje të korteksit cerebral, që është shtresa e jashtme e trurit përgjegjëse për mendimin, perceptimin dhe gjuhën.
Dhe ajo rrudhje ndikonte veçanërisht në rajonet e trurit të lidhura me kujtesën në punë, frenimin, vëmendjen dhe rregullimin emocional, thotë studiuesi kryesor Metju Albaug, një psikolog klinik dhe asistent profesor në Universitetin e Qendrës Mjekësore të Universitetit të Vermontit, në Bërlington.
U pa se në moshën 19 vjeçar, adoleshentët që pinin marijuanë po tregonin shenja të paaftësisë për t’u përqendruar, theksoi ai.“Kanabisi ndikon direkt tek neuro-maturimi, sidomos në disa zona paraballore të trurit, dhe kjo nga ana tjetër mund të ketë një ndikim tek impulsiviteti, që është aftësia e dikujt për t’u përqendruar”- shprehet Albaug.
Për këtë studim, ekipi i tij shqyrtoi të dhënat nga një studim afatgjatë evropian i zhvillimit të trurit të adoleshentëve. Pjesëmarrësve iu skanua truri në moshën 14 vjeçare, dhe sërish kur ata mbushën 19 vjeç. Ekipi i Albaug u përqendrua tek 799 adoleshentë, të cilët në moshën 14 vjeç thanë se nuk kishin përdorur kurrë kanabis.
Skanimet fillestare të trurit, nuk treguan ndonjë ndryshim të madh midis fëmijëve. Por në skanimin që pasoi 5 vite më vonë, adoleshentët u pyetën përsëri në lidhje me përdorimin e marijuanës, ku u zbulua se tek ata që e kishin përdorur, korteksi cerebral ishte bërë gjithnjë e më i hollë, pasi lidhjet e trurit rafinohen, ndërsa shtigjet neurale të papërdorura mbyllen thotë studiuesit.
Sa më shumë kanabis të pihet, aq më i madh është hollimi i korteksit. Studiuesit planifikojnë që t’i studiojnë këta të rinj deri në moshën 23 vjeçare, për të parë nëse zhvillohen probleme të tjera në sjelljen dhe aftësitë e përdoruesve të kanabisit.
Studimi i ri u botua në numrin e fundit të revistës ”JAMA Psychiatry”. “Ka shumë të ngjarë që këto lloj ndryshimesh strukturore, të përkthehen në probleme serioze më vonë gjatë jetës”- thotë dr.Skot Krakouer, një psikiatër për fëmijë dhe adoleshentë, dhe ekspert i trajtimit të abuzimit me substancat narkotike në spitalin “Zucker Hillside” në Nju Jork.
Nga ana tjetër Albaug, thotë se gjetjet e këtij studimi duhet të merren në konsideratë nga autoritetet, teksa gjithnjë e më shumë shtete në botë po e legalizojnë përdorimin rekreativ të marijuanës për të rriturit.
Burimi i lajmit: https://medicalxpress.com/news/2021-06-pot-teenage-brain-mris.html
Përshtatur nga TIRANA TODAY
