Gjykata e Apelit në Durrës ka lënë në fuqi vendimin e Gjykatës së Shkallës së parë të Elbasanit, për Arbër Paplekajn, i cili vrau me armë zjarri Pjerin Xhuvanin. Për Arbër Paplekajn mbetet në fuqi masa e sigurisë “arrest me burg”. Paplekaj akuzohet për veprat penale “vrasje”, “vrasje e mbetur në tentativë e punonjësve të policisë” dhe “heqje e lirisë me dhunë”. Po ashtu në fuqi është lënë edhe vendimi “detyrim paraqitje” për 9 anëtarët e tjerë të grupit të armatosur. Janë lënë të lirë Arjan Hoxha, Pavlo Vuksani, Emiljan Prenga, Juljan Mataj, Erald Guga, Erjon Demushi, Taulant Ymeri, Roland Xhepa, Nuredin Kasma, të dyshuar për kryerjen e veprës penale “Heqja e paligjshme e lirisë së personit, e kryer me dhunë” në bashkëpunim. Gjykata ka lënë në fuqi masën “detyrim paraqitje” edhe për Eldjo Bekon, i akuzuar për “moskallëzim krimi”, ndërsa vijon të jetë në kërkim Kelmend Xhaferri.
Të akuzuarit:
Arjan Hoxha, akuzuar për heqje të lirisë me dhunë;
Pavlo Vuksani, akuzuar për heqje të lirisë me dhunë;
Emiljan Prenga, akuzuar për heqje të lirisë me dhunë;
Juljan Mataj, akuzuar për heqje të lirisë me dhunë;
Erald Guga, akuzuar për heqje të lirisë me dhunë;
Erjon Demushi, akuzuar për heqje të lirisë me dhunë;
Taulant Ymeri, akuzuar për heqje të lirisë me dhunë;
Roland Xhepa, akuzuar për heqje të lirisë me dhunë;
Nuredin Kasma, akuzuar për heqje të lirisë me dhunë
Eldjo Beko, arrestuar “në flagrancë”, akuzuar për pengim të hetimeve;
Çfarë ndodhi në Elbasan
Pjerin Xhuvani, 56 vjeç, i njohur si mbështetës i Partisë Socialiste dhe ish-drejtori i Fondit të Detyrueshëm të Kujdesit Shëndetësor, u ekzekutua me armë zjarri në Elbasan.
Ngjarja e rëndë la pas edhe katër persona të plagosur. Ata janë: ish-polici Emiljan Prenga 39 vjeç, person me precedent penalë; Pavlo Vuksani 50 vjeç, ish-efektiv i policisë kriminale; Eltjon Bodinaku 32 vjeç (dhëndrri i viktimës) si dhe efektivja e forcave “Shqiponja”, Xhensila Sota, 27 vjeçe.
Për vrasjen e ndodhur akuzohen dy persona: Arbër Papleka dhe Kelmend Xhaferri. I pari është ish-punonjësi i RENEA-s i vendosur pranë grupit të SMV (Struktura e Mbrojtjes së Votës në Partinë Demokratike), ndërsa i dyti njihet si Kel Çami.
