Kandidatja për kryetare në Partinë Demokratike, Edi Harxhi ka ftuar Lulzim Bashën dhe kandidatët e tjerë që do të marrin pjesë në zgjedhjet e 13 qershorit, që të zhvillojnë një debat publik.
E ftuar në emisionin ”Kjo Javë’’, në ”News 24’’, Harxhi u shpreh se nëse Basha do të jepte dorëheqjen, gara do të ishte më e barabartë, megjithatë ajo tha se kryedemokrati mund ta zgjedhë vetë median apo strukturën për të dalë në debat.
Duke u ndalur te kandidatura e saj, Harxhi shikon si pikën e saj më të foerë, kthimin e Partisë Demokratike në idealet e viteve 90, teksa shtoi se kjo forcë politike duhet të reformohet dhe të strukturohet.
Edit Harxhi: ”Pika ime më e fortë do të jetë kthimi i PD në idealet e viteve 90. Duhet të reformohet e gjitha, të strukturohet, në tre mënyra, në formë ideologjike, duhet formë tjetër, është më tepër në qendër se djathtas. Duhet të ristrukturohet në brendësi sepse strukturat e saj sot janë amorfe, në degë e seksione apo grupseksione s’ka solide. E treta duhet ristrukturim të fortë në përmbajtje, si statuti.
Duhet të jenë vlerat të parat, kontributet. Ajo çfarë nuk u bë në këto 8 vite, po u çbë, është bashkimi, hapja e afrimi i të gjithëve atyre që kanë kontribuar e kontribuojnë në PD. Po të jepte dorëheqjen Basha do të kishte më shumë barazi. Unë i bëj ftesë Bashës dhe gjithë kandidatëve të tjerë, i ftoj në debat publik. Basha ta zgjedhë vetë forumin, median, strukturën për të dalë në debat publik. Cili është vizioni ynë. Nuk shoh ndonjë vizion të ri tek Basha për PD. Të fillosh nga e para pas 8 vitesh nuk është vizion.”
