Organizata Botërore e Shëndetësisë (OBSH) ka paralajmëruar se viti i dytë i pandemisë do të jetë më vdekjeprurës se i pari.
Lajmin e bëri të ditur drejtuesi i OBSH-së, Tedros Adhanom Ghebreyesus, ndërsa shqetësimi kryesor është India, shkruan The Guardian.
OBSH u bëri thirrje vendeve të pasura që të rishikojnë planet për të vaksinuar fëmijët dhe të dhurojnë vaksina nëpërmjet programit COVAX për vendet e varfëra.
“Unë e kuptoj pse disa vende duan të vaksinojnë fëmijët dhe adoleshentët e tyre, por tani i nxis ata të rishikojnë vendimet e ture dhe në vend të kësaj të dhurojnë vaksina npërmjet programit COVAX.”, tha Ghebreyesus, gjatë një konference online në Gjenevë.
Deri më tani, në të gjithë botën janë regjistruar mbi 162 milion raste me Covid-19, dhe 3.3 milion viktima. Vendet më të prekura janë SHBA, India dhe Brazili, sipas Worldometers.
Disa ditë më parë, Organizata Botërore e Shëndetësisë tha se varianti B.1.617 i koronavirusit, i identifikuar për herë të parë në Indi vitin e kaluar, është klasifikuar si variant i shqetësimit global.
Vala shkatërruese në Indi ka mbingarkuar sistemin e kujdesit shëndetësor, ndërsa ekspertët thonë se shifrat zyrtare për rastet dhe viktimat janë shumë më të ulëta sesa shifrat reale.
Sipas ekspertëve, varianti B.1.617 në Indi mund të jetë një nga faktorët që përhap në mënyrë alarmante koronavirusin.
