Një ekip studiuesish nga Instituti i Universitetit të Uashingtonit për Matjet dhe Vlerësimin e Shëndetit (IHME), kanë zbuluar prova që sugjerojnë se numri i njerëzve që kanë vdekur për shkak të Covid-19 është shumë më i lartë, sesa përshkruhet në raportet zyrtare.
Ata kanë ndërmarrë një analizë të hollësishme vend pasi vendi të vdekjeve për shkak të koronavirusit të ri, që përfshin faktorë të lidhur me pandeminë si një e tërë, dhe i kanë publikuar gjetjet e tyre në faqen e internetit të institutit.
Shumica e ekspertëve mjekësorë të përfshirë në analizimin e pandemisë aktuale, pajtohen se numri i njerëzve që kanë vdekur nga Covid-19 është më i lartë nga sa tregojnë raportet zyrtare. Kjo për shkak se shumë njerëz që kanë vdekur, nuk janë klasifikuar si viktima të Covid-19.
Përkundrazi, ata u renditën si të vdekur nga shkaqe të tjera. Në jo pak raste vdekjet e tyre nuk janë regjistruar fare. Ajo për të cilën ekspertët nuk kanë rënë dakord, është shkalla e ndryshimit midis shifrave zyrtare dhe atyre reale.
Prandaj në këtë përpjekje të re, studiuesit u përpoqën që të bënin vlerësime për numrin e përgjithshëm të njerëzve që vdiqën në secilin vend të botës, për t’i analizuar më pas së bashku, për të gjetur një numër total global.
Puna me këto shifra, përfshinte kombinimin e regjistrave të vdekjeve për secilin vend, me kohën që ka përkuar me pandeminë, dhe pastaj krahasimin e këtyre të dhënave me numrin mesatar të vdekjeve gjatë viteve të fundit.
Për shifrat që tejkalojnë mesataren vjetore, u supozua se i atribuohen sëmundjes së Covid-19 ose faktorëve të tjerë të lidhur me pandeminë, si për shembull mundësisë së rritur të vdekjes nga kanceri për shkak të frikës së kërkimit të trajtimit spitalor gjatë pandemisë.
Për të arritur në përfundimet e tyre, studiuesit numëruan vdekjet nëpër botë javë pas jave, duke u ndalur në 6 faktorë të vdekshmërisë:vdekjet totale zyrtare nga Covid-19, shtimin e vdekjeve për shkak të trajtimit të vonuar për sëmundjet e tjera, rritjen e numrit të vdekjeve për shkak të shtimit të problemeve të shëndetit mendor si depresioni, zvogëlimet e vdekjeve, për shkak të më pak incidenteve që përfshijnë lëndime, si aksidente automobilistike për
shkak të pandemisë, ulje të vdekshmërisë për shkak të përhapjes më të vogël të sëmundjeve të tjera si gripi, dhe rënia e numrit të vdekjeve për shkak të njerëzve që do të kishin vdekur nga sëmundje të tjera të tilla si sëmundjet kronike, por që u klasifikuan si vdekje nga Covid-19.
Pasi analizuan të dhënat e tyre, studiuesit gjetën mospërputhje të mëdha midis niveleve zyrtare të vdekjeve, dhe atyre që gjetën përmes llogaritjeve të tyre. Për shembull,Egjipti raportoi pak më shumë se 13.000 vdekje, në një kohë që numri i llogaritur nga IHME arriti në 170.000 viktima.
Një shembull tjetër ishte Rusia. Zyrtarët atje raportuan pak më shumë se 100.000 vdekje nga Covid-19, ndërsa ekipi i studiuesve i IHME zbuloi se numri më i mundshëm real është mbi 600.000 viktima. Ndërkohë, studiuesit zbuluan gjithashtu se numri aktual i vdekjeve në SHBA, ka të ngjarë të jetë gati 2 herë më i lartë se sa raportet zyrtare, sipas të cilave deri në 3 maj ishte 574.043.
Ata zbuluan se ka më shumë të ngjarë që numri real të jetë afërsisht 905.289. Pra, në tërësi studiuesit zbuluan se shifrat mbi numrin e të vdekurve në mbarë botën kanë qenë shumë më të ulëta sesa vdekjet reale.
Deri më 6 maj, OBSH raportoi se numrin e të vdekurve në të gjithë botën (që është llogaritur duke përdorur statistikat zyrtare të secilit vend) ishte 3.25 milion njerëz. Ndërkohë, ekipi i IHME zbuloi se numri real është gati 6.93 milion.
Burimi i lajmit: https://medicalxpress.com/news/2021-05-university-washington-covid-deaths-higher.html
Përshtatur nga TIRANA TODAY
