Kryetari i Partisë Demokristiane të Shqipërisë, Nard Ndoka duket se nuk i ka kursyer kritikat ndaj aleatit të tij, kryedemokratit Lulzim Basha.
Sipas tij, Basha e ka marrë me sportivitet fushatën, dhe se sa më shpejt duhet të reagojë ndaj kryeministrit Edi Rama.
Ndoka shprehet se Rama ka nisur nga puna për të fituar zgjedhjet, ndërsa Basha s’ka nisur ende që të flasë fort dhe guximshëm.
“Lulzim Basha duhet t’i tregojë vendin Edi Ramës sot, sepse nesër do të jetë shumë vonë. Si me shumë sportivitet e ka marrë këtë përballje Lulzim Basha! Edi Rama shembi Kushtetutën, zhbëri Kodin Zgjedhor, hoqi kandidatët opozitare nga gara, po riorganizon bandat, ka filluar presionin kudo, oligarkët kanë hapur thasët, ndërsa Basha akoma nuk ka hequr “maskën e pandemisë” për të folur fort, qartë dhe guximshëm! Qytetarët kërkojnë ndryshimin, rrotacioni është i sigurtë, Basha duhet t’i tregojë vendin Edi Ramës sot, sepse nesër do të jetë vonë për të gjithë, edhe për Shqipërinë!,“-shkruan Ndoka në rrjetin social, Facebook.
