Nga Pierre Haski “Internazionale”
Ndërsa e gjithë bota i kishte sytë nga ajo që po ndodhte në Shtetet e Bashkuara të Amerikës, 1 mijë policë në Hong Kong arrestuan 53 anëtarë të lëvizjes demokratike atje, ish-deputetë dhe aktivistë të shoqërisë civile, bazuar në ligjin e ri të sigurisë kombëtare të vendosur nga Pekini, që parashikon burgim të përjetshëm për disidentët e regjimit komunist.
Kjo goditje e fundit ndaj asaj që mbetej nga liria politike në territorin teorikisht autonom, ka provokuar disa reagime të ashpra në botën perëndimore. Por një nga zërat deri dje më me peshë e ka humbur besueshmërinë:ai është Majk Pompeo, shefi i diplomacisë së së presidentit në largim Donald Trump.
Në mënyrë të pashmangshme, kriza e demokracisë amerikane e krijuar nga presidenti në largim, ka shkaktuar tallje dhe sarkazëm në kryeqytetet, të cilat Shtetet e Bashkuara i fajësojnë vazhdimisht për mosrespektimin e demokracisë. Në radhë të parë nga Kina, por edhe Irani, Rusia, Turqia ose Venezuela:që të gjitha vende, ku imazhet e sulmit në godinën e Kongresit Amerikan janë pritur me kënaqësi.
Propaganda e kundërsulmit
Kjo ironi është sigurisht e thjeshtë, por ajo është gjithashtu shumë e dobishme, veçanërisht kur temat e propagandës shërbehen në një “pjatë argjendi”. Për shembull shihni Hong Kongun: qeveria kineze nuk humbi asnjë minutë kohë para se t’i kujtojë SHBA-së se 18 muaj më parë parlamenti lokal u pushtua dhe u plaçkit nga protestuesit… të mbështetur nga Uashingtoni.
Por dallimi është i qartë. Në një rast demonstruesit po bënin thirrje për më shumë demokraci, ndërsa në rastin tjetër ata donin të ndalnin një proces demokratik. Sidoqoftë, krahasimi i dha mundësi Pekinit të fliste për standarde të dyfishta nga ana e Uashingtonit, dhe të diskretitonte Shtetet e Bashkuara.
Kjo dredhi është veçanërisht e dobishme në një kontekst të karakterizuar nga Lufta e Ftohtë Kinë-SHBA gjithnjë e më e fortë, dhe në të cilën Pekini po mburret me modelin e tij njëpartiak, së bashku me menaxhimin efikas të pandemisë, dhe rikthimin e saj të shpejtë tek rritja ekonomike, ndërsa Perëndimi demokratik po vazhdon të përballet me koronavirusin dhe pasojat e tij.
Futja e Xho Bajdeni në Shtëpinë e Bardhë, nuk do t`a ndryshojë menjëherë situatën. Presidenti i ri do të trashëgojë një vend të përçarë dhe të traumatizuar nga ngjarjet e fundit, me një pjesë të popullsisë që është e bindur se zgjedhjet ishin të vjedhura.
“Bota po na sheh”- bërtiti presidenti i zgjedhur më 7 janar, ndërsa mbështetësit e Trump sulmuan kongresin. Çështja është edhe më serioze, nëse kemi parasysh se Bajden e kishte bërë mbrojtjen e demokracisë një nga boshtet e diplomacisë së tij të ardhshme, me thirrjen e një samiti të demokracisë gjatë muajve të ardhshëm.
Me sa duket, Bajden do të duhet të jetë i pari që të rivendosë besimin e qytetarëve tek demokracia amerikane. Ky dobësim i pozitës së Shteteve të Bashkuara, që nuk është diçka e re, por që sigurisht është përkeqësuar shumë kohët e fundit,lë pa mbrojtje të gjithë ata që ashtu si demokratët në Hong Kong, shpresonin për mbështetjen e Perëndimit.
Evropa po përpiqet që të ngrejë disi zërin në skenën ndërkombëtare. Por,pasi nënshkroi një marrëveshje të diskutueshme të investimeve me Pekinin në fundin e dhjetorit, as ajo nuk ka më besueshmërinë e nevojshme. E gjithë kjo, na kujton se për të udhëhequr përmes shembullit, duhet që të jesh vetë shembullor. Sot mungesa e shembullit midis demokracive liberale, po shërben si objekt talljeje nga autokratët e të gjitha llojeve.
Burimi i lajmit: https://www.internazionale.it/opinione/pierre-haski/2021/01/08/stati-uniti-democrazia-autoritari
Përshtatur nga TIRANA TODAY
