Sfida e 8 shtatorit 2021 Kosovë-Spanjë mund të luhet në Shqipëri. Presidenti i Komitetit Olimpik të Kosovës, Besim Hasani u shpreh së fundmi se nëse sfida mes “Furisë së Kuqe” dhe “Dardanëve” nuk zhvillohet në Kosovë, atëherë do të zgjidhet Shqipëria si terren neutral për të lejuar organizimin e takimit.
Në një intervistë për “Kosova Press”, Hasani shtoi se do të bëhen të gjitha përpjekjet që takimi i shtatorit të vitit të ardhshëm, e vlefshme për eliminatoret e Kupës së Botës 2022 të luhet normalisht në Kosovë.
E gjithë kjo rrëmujë është shkaktuar për shkak se Spanja nuk e njeh Kosovën si shtet. Ditë më parë ministrja e Jashtme e Spanjës u shpreh se pavarësisht ngërçit diplomatik të krijuar mes dy vendeve, Spanja do të respektojë rregulloret e FIFA-s dhe UEFA-s.
“Kosova – Komiteti Olimpik i Kosovës është i njohur në Komitetin Olimpik Ndërkombëtar më të drejta të plota dhe të gjitha federatat sportive janë të njohura nga federatat përkatëse ndërkombëtare që nënkupton që ne jemi të barabartë sikurse edhe të gjithë anëtarët e Komitetit Olimpik Ndërkombëtar por edhe federatave ndërkombëtare, në këtë rast edhe UEFA-së dhe FIFA-së. Dhe absolutisht kemi të drejtë të trajtohemi të barabartë sa i përket pjesëmarrjes, udhëtimit, vizave, por edhe simboleve që i ka një shtet, flamuri, himni dhe kështu me radhë.
Kështu që në këtë drejtim, jam optimist që ky pluhur i ngritur lartë do të bie gradualisht poshtë dhe do të vijnë të gjitha këto kombëtare për të luajtur këtu në Kosovë dhe ne do të udhëtojmë dhe të zhvillohen lojërat dhe në vende të tjera, përndryshe, siç e thash pasojat munden me qenë shumë të mëdha për këto shtete, respektivisht për këto federata.
Ndeshja me Spanjën – Kosova duhet të insistojë që garat të mbahen në vendin tonë, në Kosovë, jo në ndonjë vend tjetër, qoftë edhe në Shqipëri, që do të ishte ndoshta një variant më i pranueshëm, mirëpo kjo duhet të insistohet në institucionet më të larta, që të mos lëshohet pe. Këto janë njëherë vetëm skenarë të mundshëm por unë besoj që edhe ne si Komitet Olimpik por edhe Federata e Futbollit në bashkëpunim edhe me Komitetin Olimpik Ndërkombëtar edhe me UEFA-në dhe FIFA-në që mos të lëshohet pe në këtë drejtim por të insistohet deri në fund që garat të mbahen në Kosovë dhe ne të shkojmë të luajmë në këto vende”, deklaroi Hasani.
