Bashkimi Evropian vendosi sanksione kundër Aleksandër Lukashenkos, djalit të tij, Viktar, dhe 13 zyrtarëve të tjerë bjellorusë, përgjegjës për dhunë, arrestime të pajustifikueshme dhe falsifikim të zgjedhjeve presidenciale në Bjellorusi.
Gazeta Zyrtare e BE-së publikoi të premten emrat e 15 individëve që u ndalohen vizat dhe u ngrihen asetet.
Ata u bashkohen 40 zyrtarëve të tjerë bjellorusë, të cilët u sanksionuan me masa të ngjashme në fillim të tetorit, për rolin e tyre të pretenduar në shtypjen brutale të protestuesve dhe opozitës.
Protestuesit në Minsk dhe qytete të tjera, për gati tre muaj, kërkojnë dorëheqjen e Lukashenkos, duke e akuzuar për falsifikimin e zgjedhjeve presidenciale të 9 gushtit.
Autoritetet u janë përgjigjur brutalisht protestave, me rrahje dhe arrestime masive. Lukashenko mban pushtetin në Bjellorusi që prej vitit 1994.
Ai i mohon akuzat për manipulim të votave dhe i fajëson disa vende të Bashkimit Evropian për përpjekje për të detyruar ndryshimin e regjimit.
Vendet perëndimore refuzojnë ta njohin Lukashenkon si udhëheqës legjitim të Bjellorusisë dhe i kërkojnë atij ta transferojë pushtetin në mënyrë paqësore.
