Një nga anëtarët e grupit shkencor që këshillon qeverinë britanike, Mark Walport, është shprehur se pandemia e koronavirusit do të jetë gjithmonë prezentë, “në një formë ose në një tjetër”.
Sipas tij, kjo do të kërkojë që njerëzit të vaksinohen në intervale të rregullta.
Komentet e tij erdhën pak pasi kreu i OBSH tha se shpresonte që pandemia të vihej nën kontroll brenda dy vjetëve, siç kishte ndodhur me parë dhe me pandeminë shfarosëse të Gripit Spanjoll.
Në një intervistë për BBC, Walport tha se rritja e dendësisë së popullatave dhe shtimi i mjeteve të udhëtimit shtojnë përhapjen e virusit.
Ai theksoi se për vënien nën kontroll të pandemisë do të kërkohet “vaksinim global”, edhe pse koronavirusi “nuk është një sëmundje si lia, e cila zhduket me anë të vaksinimit”.
“Ky është një virus që do të jetë me ne përgjithmonë, në një formë apo në një tjetër, dhe me siguri do të kërkojë vaksinime të përsëritura. Prandaj ashtu si gripi, njerëzit do të duhet të vaksinohen në intervale të rregullta”, tha ai.
Kreu i OBSH, Tedros Adhanom Ghebreyesus, tha më herët se Gripi Spanjoll i 1918 kërkoi dy vjet për vënien nën kontroll, por avancimet në teknologji mund t’i lejojnë botës të ndalojë koronavirusin “në një kohë më të shkurtër”.
