Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, paralajmëroi se në çështjen e pandemisë, më e keqja nuk ka ardhur ende.
“Pandemia e Covid-19, përfundimisht do të kalojë, por nuk do të jetë e mundur të kthehemi në situatën e mëparshme. Ne nuk mund të vazhdojmë ‘të financojmë’ panikun, por duhet të përgatitemi për situatat e tjera të mundshme”, tha drejtori i përgjithshëm i OBSH-së.
Sipas tij, tashmë është koha e duhur për t’u përgatitur për pandeminë tjetër. “Ndërsa ne jemi duke punuar për t’iu përgjigjur kësaj pandemie, ne gjithashtu duhet punojmë më shumë për t’u përgatitur për tjetrën. Tani ne kemi mundësinë për të hedhur themelet për sistemet elastike të kujdesit shëndetësor në të gjithë botën”.
Ai tha gjithashtu se “Historia do të na gjykojë të gjithëve, jo vetëm se si kemi dalë nga kjo pandemi, por edhe për mësimet që kemi nxjerrë dhe veprimet që kemi ndërmarrë pasi të ketë kaluar Covid-19”.
