Një rast i pazakontë i encefalopatisë sponxhiforme të gjedhit, e ashtuquajtur sëmundja e “lopës së çmendur”, është zbuluar në Zvicër. Lajmin e ka konfirmuar Zyra Federale e Sigurisë Ushqimore dhe Veterinarisë (OSAV), ndërsa qetëson qytetarët se nuk përbën rrezik për shëndetin.
“Analiza e kryer tregoi se nuk bëhej fjalë për një formë klasike, por për një formë të pazakontë të sëmundjes”, theksuan autoritetet. “Kjo formë e pazakontë nuk përbën rrezik për shëndetin e njerëzve”, tha zëdhënësja e OSAV-it.
Rasti iu njoftua Organizatës Botërore të Shëndetit të Kafshëve, si edhe BE-së.
Sëmundja e “lopës së çmendur”, është një çrregullim i rrallë, i pashërueshëm dhe fatal për njeriun. Sëmundja godet rëndë neuronet e trurit, duke bërë që njeriu të humbasë gjithmonë e më shumë aftësinë për të koordinuar lëvizjet, aftësinë për të folur, kujtesën dhe gradualisht shkon deri në vdekje.
Kjo sëmundje u shfaq për herë të parë në vitin 1986, pas identifikimit pozitiv në Angli të një gjendjeje të ngjashme te lopa. Dhe për këtë arsye tashmë njihet si sëmundja e “lopës së çmendur”. Në vitin 1996, rastet në njerëz të “variantit” të sëmundjes Creutzfeldt-Jakob (vCJD), e cila lidhet fuqishëm me konsumimin e produkteve të mishit nga kafshët e infektuara me BSE, u shfaq së pari në Britaninë e Madhe.
