Pas lajmit në mediat serbe se Republika e Naurus ka tërhequr njohjen e pavarësisë së Kosovës, ka ardhur reagimi i Ministrisë së Punëve të Jashtme.
Në një prononcim për “Gazeta Express”, Këshilltari i Ministrit në Detyrë të MPJ-së, Jetlir Zyberaj deklaroi se Ministria e Punëve të Jashtme është duke punuar përmes kanaleve diplomatike me të gjitha shtetet. Teksa shtoi se Kosova nuk komenton deklaratat dhe dokumente e publikuara nga Beogradi. Sipas tyre, qeveria serbe paguan ryshfet për t’i nxjerrë këto dokumente.
Mes të tjerash, Zyberaj theksoi se dy vendet kanë marrëdhënie diplomatike të vendosura në përputhje me Konventën e Vjenës.
“Ministria e Punëve të Jashtme e Republikës së Kosovës po punon përmes kanaleve diplomatike me gjitha shtetet. Kosova nuk bën komente për dokumentet dhe deklaratat që shpallen nga Beogradi dhe që si në të kaluarën, si në rastin e Republikës së Afrikës Qendrore ryshfetet janë përdorur për të lëshuar dokumente dhe për të bërë deklarata që janë hedhur poshtë nga qeveritë e veta më vonë.
Ne nuk kemi marrë asnjë komunikim dhe dy vendet tona kanë marrëdhënie diplomatike të vendosura në përputhje me Konventën e Vjenës për Marrëdhëniet Diplomatike”, ka thënë Zyberaj.
