Ambasadori i Turqisë në Tiranë, Murat Ahmet Yoruk deklaroi se anëtarët e Lëvizjes Gylen ndodhen në panik. Sipas tij, ata e dinë shumë mirë që fati i tyre do të jetë duke dhënë llogari përpara drejtësisë turke.
“FETO ka filluar të bjerë në Shqipëri. Personat e lidhur me ata janë në panik dhe e dinë shumë mirë se çfarë do i gjejë. Këtu ne i ndjekim nga afër këta njerëz dhe këto struktura”, paralajmëroi Murat Ahmet Yoruk.
Teksa ishte i ftuar në emisionin “Top Talk”, Yoruk u shpreh se në bashkëpunim me qeverinë shqiptare janë marrë disa vendime ndaj kësaj lëvizjeje. Ndërsa shton se ende ka persona juridik në Shqipëri që kanë marrëdhënie direkte me FETO.
“A ka ndonjë marrëveshje në kontekstin kundër FETO? Siç e dini, ne kemi një marrëveshje të bashkëpunimi të sigurisë e nënshkruar gjatë vizitës së fundit të presidentit tonë.
Kjo marrëveshje hyri në fuqi vitin e kaluar. Janë marrë disa vendime dhe do të merren hapa konkrete për të pastruar ekzistencën e FETO në Shqipëri, për të eliminuar këto struktura dhe për të larguar këto struktura jashtë Shqipërisë”, theksoi Yoruk.
