Ka ndryshuar rregullorja për të gjithë ata që planifikojnë të kryejnë punime në shtëpitë e tyre. Për të marrë një leje për të kryer punime në shtëpi, tashmë duhet të presësh 20 ditë për lejen e ndërtimit. Afati i përcaktuar në rregulloren e vjetër ka qënë 10 ditë kalendarike ndërsa tani është 20 ditë.
Sipas Monitor, ndryshimet vlejnë sidomos për shtëpitë private, për ndërtime që lidhen me: ndërtim shkallësh, rrethime, struktura me material të çmontueshme apo ndryshime fasadash.
Në rregulloren e vjetër citohej se: “Autoriteti përgjegjës vendos, brenda 10 ditëve pune nga data e dorëzimit të aplikimit për leje ndërtimi me procedurë të përshpejtuar, për rastet: a) e punimeve që kanë vëllim të kufizuar ndërtimi ose impakt të ulët në territor, si: i. shkallë; ii. rrethime; iii. struktura me materiale të lehta e të çmontueshme; iv. ndryshime fasade etj. b) kur aplikuesi paguan tarifë aplikimi të barabartë me dhjetëfishin e tarifës së parashikuar për leje ndërtimi”.
Në ndryshimin e ri përveç afatit kohor 20 ditë tashmë ka ndryshuar dhe rregulli për procedurën e përjeshpejtuar. Tani procedura e përshpejtuar do të aplikohet vetëm për rastet kur ka emergjenca.
“Autoriteti përgjegjës vendos me procedurë të përshpejtuar, brenda 5 (pesë) ditëve pune nga data e paraqitjes së aplikimit në sistemin e-leje, për pajisjen me leje ndërtimi, për ndërtimin, riparimin apo restaurimin e objekteve të dëmtuara, si pasojë e fatkeqësive natyrore dhe emergjencave civile. Përjashtimisht, vetëm për këto raste: a) aplikimet paraqiten për shqyrtim dhe miratim nëpërmjet sistemit elektronik të lejeve nga ana e Institutit të Ndërtimit; b) dokumentacioni i vetëm që duhet të dorëzohet nga aplikuesi është: i. raporti i hartuar nga komisioni apo struktura përkatëse e emergjencave civile, që vërteton shkaktimin e dëmit si pasojë e fatkeqësisë natyrore; ii. projekti teknik/konstruktiv i hartuar nga Instituti i Ndërtimit” thuhet në rregulloren e re.
Në rregulloren e re është përcaktuar edhe një ndryshim në dokumentacionin që duhet të paraqiten nga ndërtuesi. Kryesisht, referuar disa ndryshimeve ligjore që kërkojnë sigurim 10 vjeçar të apartamenteve të reja rregullorja ka shtuar se mes një liste të gjatë dokumentesh ndërtuesit duhet të paraqesin edhe policën e sigurimit.
