Shoqata për Mbrojtjen e Tregtarëve dhe Tregut të Shqipërisë, tha të martën se Agjencia e Kontrollit Ushqimor (AKU) ‘po mban padrejtësisht’ në ambientet e Doganës së Tiranës, një ngarkesë prej 5 ton kripë Himalaje të kompanisë Neranxi.
Shoqata tha gjithashtu se malli është bllokuar prej 4 ditësh, nga AKU, edhe pse sipas saj, gjithë dokumentacioni ishte në rregull. Shoqata pretendon se Instituti i Shëndetit Publik nuk ka pranuar të marrë mostrat, duke vënë në dukje se kjo ndalohet edhe nga legjislacioni shqiptar, pasi nuk mund të ndalohet puna e një biznesi.
“Mendojmë se këto veprime bllokuese të biznesit, kanë prapavijë dhe qëllime të mirëmenduara. Gjithçka bëhet e drejtuar nga qeveritarët dhe Kryeministri Edi Rama, në mënyrë që të favorizojë në treg klientët e tij dhe oligarkët e pushtetit”, tha shoqata në një deklaratë dërguar mediave.
