Rebelët “Houthi” në Jemen thanë se mijëra ushtarë sauditë janë kapur robër dhe shumë të tjerë janë vrarë pas një sulmi të gjerë pranë kufirit mes Jemenit dhe Arabisë Saudite. Koloneli Yahiya Sarea, zëdhënës i rebelëve, i tha BBC-së se tri brigada saudite janë dorëzuar afër qytezës saudite, Najran, dhe forcat saudite kanë pësuar humbje të mëdha në trupa dhe makineri. Zyrtarët sauditë nuk e kanë konfirmuar apo mohuar këtë deklaratë. Koloneli Sarea tha gjithashtu se të gjithë ushtarët e zënë rob do të shihen në një rrjet televiziv të dielën.
Rebelët kanë marrë përgjegjësinë edhe për sulmet me dronë në stacionet e naftës në Arabinë Saudite më 14 shtator, të cilat ndikuan në zvogëlimin e prodhimit botëror të naftës për 5 për qind dhe në rritjen e çmimit të karburanteve. Arabia Saudite, Shtetet e Bashkuara, Britania e Madhe, Franca dhe Gjermania fajësuan publikisht Iranin për këto sulme. Republika islamike mohoi të ketë gisht në këtë incident.
