Maturantët mbetës në një nga provimet e maturës shtetërore kanë një shans të dytë për të ridhënë provimin dhe për të garuar në universitet, për kuotat e mbetura bosh. Në fundin e këtij muaji, organizohet sesioni i dytë i provimeve të maturës që teston jo vetëm maturantët e këtij viti, por maturantët e vjetër si dhe ata që vijnë nga jashtë vendit.
Për ta, është përcaktuar një fashë kohore që nis në fund të muajit gusht, deri më 6 shtator. Sa i takon organizimit, përveç datave, asgjë nuk ndryshon në strukturën dhe kohëzgjatjen e testit. Tezat do të hartohen nga ekspertët e qendrës së shërbimeve arsimore dhe do të korrigjohen po nga ata. Risia e këtij viti është vlerësimi elektronik, i cili do të implementohet për të parin vit dhe vetëm për pjesën e parë të tezës, pyetjeve me alternativa.
Pyetjet me shtjellim dhe esse-të që kërkojnë sy të mprehtë do të vijojnë të kalojnë në dy duar korrigjuesish. Ndryshe nga maturat e viteve të shkuara, janë katër provime gjithsej që do të japë ky brez e në vazhdim. Përveç tri provimeve me detyrim, do të jetë vetëm një lëndë fakultative që maturantët e kanë caktuar në formularin A1/ A1Z.
Në sesionin e dytë, do të ketë çdo tri ditë provime. Ato nisin me gjuhën e huaj më 27 gusht, e cila ndiqet nga Gjuha shqipe e letërsia në datën 30, Matematika në 3 shtator dhe tri ditë më vonë, provimi i vetëm me zgjedhje.
DATAT
Gjuhë e Huaj 27 gusht;
Gjuhë shqipe dhe Letërsi 30 gusht;
Matematikë 03 shtator;
Provim me zgjedhje 06 shtator.
