Shtyhet sërish seanca gjyqësore e Saimir Tahirit. Gjykata e Krimeve të Rënda e ka shtyrë seancën për në datën 17 korrik, me arsyen se prokura e Gjergj Kohilës për avokaten nuk ishte e rregullt.
Mësohet se Tahiri mbërriti më herët në Gjykatën e Krimeve të Rënda, i shoqëruar nga avokati i tij Maks Haxhia. Ai përballet kundër disa akuzave, përfshirë edhe atë për trafik lëndësh narkotike.
Kujtojmë se seanca e parë ndaj tij u shty si pasojë e mungesës në sallë të ish tre zyrtarëve të policisë së Vlorës, përkatësisht Jaeld Çela, Sokol Bode dhe Gjergji Kohila. Në atë kohë, gjykata u shpreh se duhet të rinjoftonte edhe njëherë tre personat e lartpërmendur, pasi nuk kishin marrë dijeni për nisjen e procesit.
Por, Jaeld Çela kishte lëshuar në datën 17 qershor një prokurë që thoshte që ishte dakord të përfaqësohej në mungesë nga avokati i tij. Kjo gjë nuk i ka pëlqyer fare Tahirit, i cili deklaroi se po bëhej qëllimisht dhe se ka persona që nuk janë të interesuar për drejtësi. Në seancën e mëparshme, Saimir Tahiri kërkoi që procesi të bëhej me kohë të shkurtuar.
Nëse Tahirit i pranohet kjo kërkesë, atëherë procesi do mbyllej me 3 seanca.
