Është mbyllur protesta e nëntë kombëtare e opozitës së bashkuar me fjalimin e Bashës në selinë blu. Ndryshe nga çdo protestë tjetër e opozitës, këtë herë nuk ka pasur asnjë incident, teksa drejtuesit e opozitës janë kujdesur që të mos hidhen mjete piroteknike para Kryeministrisë dhe as para Kuvendit.
Basha bëri thirrje për lirimin e Bardh Spahisë dhe gjithë demokratëve. Në mbyllje të fjalës, kryedemokrati deklaroi se ‘ora e fitores po afron’, ndërsa tha se ata do mbeten të bashkuar përgjatë gjithë javës tjetër, duke lënë të kuptohet organizim tjetër nga ana e opozitës.
Fjala e Bashës:
E bëtë të pakthyeshëm fatin politik të kufomës politike të rilindjes. Mirënjohje të madhe kam për të gjithë qytetarët që u bashkuan nga Vermoshi në Konispol, nga shkodran ë Durrës dhe u derdhën sonte në atë që erdhi si oqeani i shpresës dhe që nisi ndryshimin e madh.
Asnjë hap pas nuk hedhim, 30 qershori është varreza politike e Edi Ramës, zgjedhje pa opozitën nuk ka e nuk do të ketë kurrë.
Por, sonte me bekimin dhe kërkesën tuaj, qëndrimin tonë politik për zgjidhjen e krizës përmes kushtit të panegociueshëm të largimit të Edi Ramës, i shtohet një tjetër kusht i panegociueshëm: arrestimi dhe çuarja para drejtësisë e hajdutëve të votave tuaja, nga i pari tek i fundit. Nuk ka zgjedhje të lira pa çuar para drejtësisë hajdutët e votave tuaja. Duke kujtuar cdo person arrestuar e mbajtur në burg, nga Bardh Spahia me shokë, dua t’i them Lleshajt me shokë që shumë shpejt do zëvendësoni Bardh Spahinë. Beteja do të vazhdojë ditë për ditë, orë për orë! Rama ik!
Nderim dhe mirënjohje për nënat, motra dhe vajzat tona,q ë e kthyen këtë në protestën më të bukur që ka njohur Shqipëria.
Mirënjohje anëtarëve të familjes time, demokratëve, dua t’u them qartë se nuk ka paqe pa drejtësi, nuk ka zgjedhje pa opozitën. Jemi më të fortë, jemi më të shumtë, jemi më të vendosur se kurrë për triumfin e demokracisë.
Jemi bashkë të hënën, të martën, të mërkurën, të enjten, të premten, të shtunën dhe të dielën. Ora e fitores po afron!
