Kreu i Partisë Demokratike, Lulzim Basha ka bërë një paralajmërim të fortë sot para protestuesve, teksa theksoi se sot “do të vulosin vdekjen politike të organizatës kriminale të Rilindjes”.
Duke folur para mijëra protestuesve, Basha tha se tashmë pas publikimit të përgjimeve, tik-taku i Ramës p mbaron në çdo kancelari të Evropës e Perëndimit.
FJALA E BASHËS:
Largimi i Edi Ramës është vetëm fillimi. Ne na duhet që së bashku të ndërtojmë mbi gërmadhat e kësaj krize, themelet e forta të një shoqërie demokratike. ndryshimi nuk do të zgjasë nëse nuk do të jetë i thellë, nëse nuk i japim fund pandëshkueshmërisë së Ramës dhe krimit të organizuar. Kjo lëvizje madhështore i fali çdo shqiptari energjinë dhe besimin për të garantuar shtetin e së drejtës, Shqipëria s’do jetë më ata që duan këta. Por që të jetë Shqipëria si Europa. E duam Shqipërinë, si gjithë Europa!
Jehona e 339 tashmë në shqip, anglisht e gjermanisht ka kapërcyer kufijtë e Shqipërisë. Nuk ka grua dhe burrë shteti që nuk e di se çfarë kryebanditi është kryeministri i Shqipërisë. Ndaj e vetmja mënyrë për ta mbytur këtë zhurmë ishte skenari i turpshëm i provokimit të dhunës, në këtë protestë!
Por plani i tij dhe i shërbëtorëve të tij dështoi me sukses të plotë. Sot ju them me përgjegjësi të plotë se tik-taku i orës së Ramës po mbaron në çdo kancelari të Evropës dhe Perëndimit, Rama ik!
Asgjë nuk e shpëton dot më, nuk e shpëtojnë dot më miqtë e tij kriminelë, as policët e korruptuar dhe as ministrat e zhytur në korrupsion. Ju falënderoj nga zemra që iu përgjigjet thirrjes time për të dalë në protestë me fëmijë për dore,
Kujtojeni mirë, sonte do vulosim vdekjen politike të organizatës kriminale të Rilindjes. I dështuar është projekti për zgjedhje pa opozitën, ne do ta mbrojmë demokracinë, do mbrojmë rendin Kushtetues, do mbrojmë ligjshmërinë. E vërteta është në krahun tonë./ Tirana Today
