Bashkia e Lezhës u bashkohet listës së bashkive të tjera që kërkojnë lirimin e ambienteve të KZAZ, me arsyetimin se do të zbatojnë dekretin e presidentit Meta për anulimin e zgjedhjeve.
Kryetari i bashkisë Lezhë Fran Frrokaj, përmes një letre të bërë publike, ka dhënë ultimatum për lirimin e ambienteve të KZAZ nr. 13, e cila është vendosur brenda shkollës ‘Besëlidhja’.
Frrokaj kërcënon se do të ndërhyhet për lirimin e ambienteve nëse materialet zgjedhore nuk do largohen deri në orën 16:00 të ditës së sotme.
Gjithashtu ai bën thirrje edhe për heqjen e afishimit të listave të zgjedhësve dhe i është drejtuar edhe Policisë së Shtetit, që t’i vijë në ndihmë për lirimin e ambienteve të KZAZ-ve.
Kryebashkiakja e Shkodrës Voltana Ademi dha të njëjtin ultimatum ditë më parë, por që nuk është respektuar nga ana e Policisë së Shtetit, të cilën ajo e konsideroi nën urdhrat e kryeministrit Rama.
Më herët mëngjesin e sotëm dhjetëra qytetarë të Tropojës, pas përplasjeve me policinë kanë hyrë në ambientet e KZAZ-ve duke thyer dyert edhe xhamat për të hequr nga KZAZ nr.9, materialet zgjedhore.
