Komisioni i Ekonomisë ka miratuar sot kontratën koncesionare për rrugën Milot-Balldren. Miratimi është bërë vetëm me votat e deputetëve të mazhorancës, pasi opozita ka votuar kundër.
E konsideruar si “rruga prej floriri”, ky aks ka shkaktuar shumë reagime dhe shkak është bërë kostoja që kap shumën deri në 256 milionë euro.
Formula e koncesionit parashikon se rruga do të ndërtohet me paratë e kompanisë private dhe në këmbim, qeveria do e shlyejë më këste për 13 vjet duke përfshirë koston e ndërtimit, dhe interesat që do i paguhet kompanisë private. Kompania fituese është shpallur “ANK”.
Ndërkohë, përfaqësues i Ministrisë, Artan Shkrel deklaroi se duhet marrë parasysh fakti që e gjithë rruga do të ndërtohet në një zonë me kushte gjeologjike jo shumë të favorshme, prandaj sipas tij duhen bërë studime e duhen marrë të gjitha masat e nevojshme nga firma.
