Ministri i Punëve të Jashtme të Sllovakisë dhe njëherësh kryesues i OSBE-së, Miroslav Lajçak ka deklaruar se mënyra e vetme e zgjidhjes së çështjes së Kosovës është dialogu mes Prishtinës dhe Beogradit, ndërsa përjashton mundësinë e ndryshimit të kufijve.
Shefi i diplomacisë sllovake në një intervistë për televizionin austriak ORF, shprehet se çështja e Kosovës nuk është aq e vështirë që të mos mund të zgjidhet.
“Rruga e vetme për zgjidhjen e problemit është vazhdimi i dialogut, kurse bashkësia ndërkombëtare duhet të bëjë çmos që të vijë deri te dialogu”, tha Lajçak.
Ndërkohë, lidhur me idenë e korrigjimit të kufijve, Lajçak thotë se paraqet rrezik, dhe krijimi i shoqërive multietnike, që është edhe ideja themelore e BE-së, nuk bëhet me ndryshim kufijsh.
“Kjo është Kutia e Pandorës dhe do të ishte një precedent. Nëse duam të zgjidhim problemet në të ardhmen, ndryshimi i kufijve mund të çojë në luftë. Duhet ta bëjmë të qartë se nuk duhet të mendojmë për ndryshimin e kufijve, por të punojmë për ndryshimin e shoqërisë”, tha ai.
