Vjen reagimi i kryeministrit Rama menjëherë pas vendimit të presidentit Meta për të shfuqizuar dekretin e zgjedhjeve vendore, në kuadër të krizës politike dhe jo vetëm.
Nga Berati ku ndodhej për prezantimin e kandidatit për kryebashkiak, Rama e cilësoi veprimin e presidentit si një gabim të radhës të tij, ndërsa tha se zgjedhjet nuk janë të presidentit dhe as të partisë, por të popullit.
Më tej, kryeministri tha se zgjedhjet do të mbahen më 30 qershor, dhe se “ato tespie do shpërbëhen” nga duart e plakut dhe kokrrat do shpërndahen andej-këndej”.
Fjala e Ramës:
Presidenti Meta bëri sërish një gabim të madh.
Zgjedhjet nuk janë as të partisë dhe as të presidentit, zgjedhjet janë të popullit.
E kuptoni se çfarë çorapi duan të bëjnë Shqipërinë demokratike. E gjitha kjo përveçse një përpjekje e dëshpëruar e një grushti njerëzish të dëshpëruar që bëjnë gjëra të dëshpëruara dhe janë të destinuar të humbin.
Kjo që sapo ndodhi është vazhdimi i asaj që ka ndodhur edhe me atë dosjen e famshme, dhe të hedhin të gjithë baltën e mundshme për të shkuar drejt realizimit të këtij plani, të shkatërrimit të zgjedhjeve e të vënë kushte për Reformën në Drejtësi.
Në vend që të niste zbardhja dhe hetimet e përgjimeve, i morën dosjet dhe i çuan te partia dhe nga partia, nuk kursyen as Shqipërinë. Nuk janë zbulime të një gazetat gjermane, janë nxjerrje e një sekreti hetimor, duke i marrë për hundësh shqiptarët që obobo i zbuloi Gjermania.
Janë një tufë të mbaruarish që e kanë nxjerrë Shqipërinë rrugëve të botës duke ushqyer me baltë për Shqipërinë.
Mbajeni mend, ato tespie do shpërbëhen nga duart e plakut dhe kokrrat do shpërndahen andej-këndej./ Tirana Today
