Presidenti Donald Trump tha se SHBA-të dhe Mbretëria e Bashkuar kanë aleancën më të mirë që ka njohur bota ndonjëherë. Këtë deklaratë, Trump e bëri sot gjatë konferencës të mbajtur me kryeministren Theresa May.
Kjo e fundit po ashtu tha se shtetet kanë një “marrëdhënie të shkëlqyer” për të cilën duhet të vazhdojnë të punojnë. Por, gjatë takimit Trump dhe May diskutuan edhe ndryshimet mes tyre, siç janë qëndrime në çështje si ndryshimet klimatike apo biznesi me Huawei.
Trump premtoi gjithashtu një marrëveshje tregtie “fenomenale”, pasi Britania e Madhe të largohet nga BE, duke sugjeruar se kjo marrëveshje mund të dyfishojë ose trefishojë tregtinë.
May tha më tej se çdo dakordësi mes dy vendeve do të pasonte me bisedimet për “atë çfarë duhet dhe çfarë nuk duhet bërë në marrëveshjen e tregtisë për të ardhmen”.
Por ka pasur edhe kritikë lidhur me vizitën e Trump. Shumë njerëz dolën në protestë në qendër të Londrës, duke ngritur zërin e tyre kundër vizitës së Trump.
Politikani Jeremy Corbyn i është bashkuar protestës, duke kritikuar qëndrimin e presidentit Trump pas sulmit të këtij të fundit ndaj kryebashkiakut të Londrës, Sadiq Khan.
“Unë jam krenar që qyteti ynë ka kryebashkiak një mysliman, që mund të luftojë islamofobinë, apo çdo lloj forme të racizmit brenda shoqërisë sonë”, tha ai.
Edhe presidenti Trump u pyet lidhur me protestat, dhe komentet e tij për kryebashkiakun e Londrës.
“Teksa shkoja në Pallatin Mbretëror pashë mijëra njerëz me flamurin amerikan dhe atë britanik. Njerëzit janë entuziastë dhe të kënaqur, nuk hasa në asnjë protestë. Kishte vetëm një grup të vogël njerëzish diku. Është e gjitha ‘fake news’.
Sa i takon kryebashkiakut, s’mund ta vlerësoj sepse nuk ka bërë asnjë gjë të mirë për vendin. Më shumë se fjalët, vlejnë veprat dhe unë nuk shoh ndonjë vepër këtu.”/ Përshtati Tirana Today
