Presidenti Ilir Meta ka komentuar krizën politike në vend, teksa nga Skrapari tha se ajo po ndikon negativisht dhe po sjell pasoja të rëndë në ekonomi.
Meta bën thirrje sërish që të reflektohet urgjentisht lidhur me situatën që po sjell dëme ekonomike, ndërsa siguron që Skrapari shumë shpejt do të jetë një nga destinacionet më të rëndësishme turistike në të gjithë rajonin.
“Me urimin për një sezon të mbarë e të suksesshëm turistik, jam i bindur se Skrapari, falë atraksioneve të jashtëzakonshme që ofron, mikpritjen, traditat e kulinarinë e veçantë, shumë shpejt do të jetë një nga destinacionet më të rëndësishme turistike në të gjithë rajonin!
Por për fat të keq, kriza politike ku ndodhet vendi, po sjell pasoja tepër të rënda edhe në ekonomi. Efektet e para kanë filluar të ndihen në turizëm dhe operatorët e cilësojnë situatën dramatike.
Edhe për këtë arsye ia vlen të reflektohet urgjentisht, përndryshe do të goditet rëndë turizmi dhe gjithë familjet shqiptare që mbështesin mirëqenien e tyre në këtë sektor kyç të ekonomisë tonë”, shkruhet në faqen e presidentit Meta.
Protestat e njëpasnjëshme dhe kriza politike në vend ka sjellë ankesa nga operatorët turistikë, që shprehen se turistët janë të frikësuar për sigurinë në Shqipëri e si pasojë numri i rezervimeve ka rënë.
