Shirat do të vazhdojnë edhe për disa dite, pavarësisht se jemi në muajin maj, ku pritej që moti të ishte i ngrohtë dhe me diell.
Sinoptikania Adiola Bani në një lidhje telefonike në News24 tha se java do të nisë me reshje shiu, të cila do të vazhdojnë deri ditën e premte.
Temperaturat do të jenë më të ulëta se sa normalja për muajin maj, ndërsa ngritja e tyre pritet të ndodhë në fundjave.
“Do të vijojë të mbetemi me reshje shiu deri ditën e premte edhe pse sot gjatë pasdites intensiteti i shirave do të vijë duke u pakësuar. Duke filluar nga orët e mbrëmjes do të kemi një përmirësim të situatës por shirat do të vijojnë të mbeten në territorin tonë deri ditën e premte.
Fundjava do të na sjellë përmirësim të situatës duke bërë që të kemi sërish ditë me diell. Ndërsa për sa i përket temperaturave java do të jetë disi e freskët pasi do të kemi praninë e vranësirave dhe reshjeve gjatë kësaj jave. Por duke filluar nga dita e enjte kemi një rritje graduale të vlerave termike duke bërë që gjatë fundjavës të kemi rritje të temperaturave dhe ditë të ngrohta,”– ka thënë sinoptikania Adiola Bani.
