Ditën e shtunë është përcjell për në banesën e fundit futbollisti Emiliano Sala, që humbi jetën tragjikisht në një aksident ajror teksa po udhëtonte nga Franca për t’u bashkuar me ekipin e ri, Cardiff-in.
Pothuajse një muaj ka kaluar nga data 21 janar kur u lajmërua zhdukja e tij, por tashmë gjithçka është mbyllur, Sala nuk është më. Ceremonia u mbajt në një provincë të Argjentinës, Sante Fe, ku të pranishëm ishin 3000 persona, ndër ta prezentë ishin edhe trajneri i Cardiffit, Neil Warnock dhe shefi i klubit Ken Choo.
Në ditën e funeralit të Emiliano Sala, është hapur edhe një kapitull i ri në luftën mes Cardiff e Nantes për pagesën e transferimit të lojtarit, që tragjikisht nuk u bë kurrë e mundur. Francezët kërkojnë ti drejtohen Uefa-s për shkak se nuk kanë marrë ende këstin e parë të 17 milionë euro për të cilën është firmosur akordi. Por ndërkohë, britanikët po përpiqen të kuptojnë nëse çmimi është ngritur për shkak të një ankandi të krijuar artificialisht nga Willie McKay, ish- prokuratori i argjentinasit Sala.
Pasi kaloi vala emocionale për lamtumirën e fundit të sulmuesit që u zhduk gjatë fluturimit për në Cardiff, në Kanalin e la Manshit, është momenti për tu kthyer në botën cinike të biznesit. Avokati i klubit anglez po zbulon nëse shoqëritë e tjera të Premier League Everton, West Ham, Crystal Palace, Fulhame, Burnley e Wolverhampton (të gjitha skuadra të lidhura me Sala para Cardiff) ishin vërtetë të interesuara për lojtarin, apo ishin pjesë e një strategjie që solli rritjen e çmimit të kartonit.
Praktikisht Cardiff është në kërkim të një ulje: nëse ankandi është krijuar artificialisht, çmimi real i lojtarit do të ishte më i pranueshëm. E një asist mund të vijë nga agjenti McKay, që në një email dërguar Sala kishte shkruar se “kishte folur me median për oferta të skuadrave të tjera pikërisht për të rritur interesin drejt teje”.
