Trupi i gjetur në rrënojat e aeroplanit të përplasur është i lojtarit të Cardiff, Emiliano Sala. Lajmi tragjik është konfirmuar nga Policia e Dorset.
28-vjeçari Sala po udhëtonte për në Cardiff në një aeroplan me piltoin David Ibbotson, i cili humbi gjurmët më 21 janar.
Trupi i argjentinasit u tërhoq vonë të mërkurën, pasi u gjet të dielën në mëngjes. Ndërsa pas ekspertizës, policia konfirmoi mbrëmjen e së enjtes së trupi është i Emiliano Sala, duke shuar kështu çdo shpresë se lojtari mund të ishte ende gjallë.
Në një deklaratë, policia tha: “Trupi i sjellë në portin e Portland sot, të enjten më 7 shkurt 2019, është identifikuar zyrtarisht nga HM Coroner për Dorset si ai i futbollistit profesionist Emiliano Sala. Familjet e Sala dhe pilotit David Ibbotson janë përditësuar me këtë lajm dhe do të vazhdojnë të mbështeten nga oficerë të ndërlidhjes së familjes të trajnuar posaçërisht.”
Trupi u zbulua në rrënojat e aeroplanit të hënën dhe autoritetet mundën ta rimarrin atë dy ditë më vonë, pavarësisht nga kushtet sfiduese.
Dega e Hetimeve të Aksidenteve Ajrore (AAIB) tha se operacioni ishte kryer “në një mënyrë sa më dinjitoze të ishte e mundur” dhe familjet e të humburve u informuan gjatë gjithë kohës.
Cardiff City, lëshoi një deklaratë pak pasi u konfirmua identiteti i viktimës, duke thënë: “Ne i ofrojmë ngushëllimet tona më të përzemërta familjes së Emilianos. Ai dhe Davidi do të mbeten përgjithmonë në mendimet tona.”
Mbrojtësi i Chelsea, Antonio Rudiger, shkruante: “Zemërthyese të dëgjosh lajmin për Emiliano Sala, pusho në paqe! Mendimet shkojnë tek familja dhe miqtë e Emilianos dhe pilotit”.
Mesut Ozil i Arsenalit ka shkruar: “Nuk ka fjalë për të përshkruar se sa e trishtueshme është kjo. Mendimet dhe lutjet shkojnë për familjen e tij dhe gjithashtu për familjen e pilotit”.
Trupi i pilotit Ibbotson nuk është gjetur ende, ndërsa vijojnë kërkimet./Burimi BBC. Përshtati TIRANA TODAY
