Presidenti i Kosovës, Hashim Thaçi ka folur për rëndësinë e një marrëveshjeje me Serbinë, në mënyrë që kjo e fundit të njohë Kosovën.
Në një intervistë për Zërin e Amerikës, Thaçi u shpreh se korrigjime kufijsh ka pasur edhe me Maqedoninë dhe me Malin e Zi, ndërsa shtoi se nuk ka njohje reciproke pa definimin e kufirit dhe se Kosova duhet të shohë me largpamësi.
“Korrigjim kemi bërë edhe me Maqedoninë edhe Me Malin e Zi ka pasur kërcënime e dërgime mesazhesh jo të mira për shtetin tonë, por në fund e kanë kuptuar që marrëveshja ka qenë e drejtë.
Prandaj them se është tani koha që ta definojmë punën e kufirit me Serbinë. Nuk ka njohje reciproke pa definimin e kufirit. Serbia është e përfshirë në dialog, ka shprehur mundësi për njohjen e Kosovës edhe Rusia ka dërguar mesazh se nëse palët merren vesh ne do t’i mbështesim. Këtë mesazh ma ka dërguar mua personalisht edhe Presidenti Putin”, tha Thaçi.
Thaçi foli ndër të tjera për një marrëveshje të hapur që mund të kalojë edhe nëpërmjet një referendumi ndërsa vendimmarrja i mbetet Kuvendit.
