Londer (CNN)- Sulm vandal është konsideruar dëmtimi i varrit të filozofit politik dhe socialistit revolucionar gjerman Karl Marks në Varrezat Highgate në Londër.
“Duket sikur dikush e ka qëlluar me një çekiç”, thotë një postim në Twitter. “Është një monument i listuar në klasin e parë dhe kjo nuk është mënyra për të trajtuar trashëgiminë tonë”.
Pas incidentit, përgjegjësit e varrezave u zotuan se do ta riparojnë memorialin sa më shumë të jetë e mundur.
Ian Dungavell, shefi ekzekutiv i Trustit të Varrezave të Miqve të Highgate, i tha CNN-it nëpërmjet telefonit, se sulmet ndaj memorialit të Marksit janë të njohura, por jo të shpeshta.
“Incidenti më i keq ishte në vitin 1970, kur u bë një përpjekje për të shkatërruar memorialin duke përdorur një bombë”, tha Dungavell
“Në vitet e fundit ka pasur sulme të tjera duke përfshirë bojatisjen dhe, në një rast, dikush u përpoq të tërhiqte kokën e memorialit me një litar. Megjithatë, ky incident i fundit është më shqetësues, sepse copat e shkëputura të mermerit të bardhë kanë humbur dhe shkronjat prej plumbi janë thyer”, tha ai.
Marksi, i cili jetoi në ndërkohën 1818 – 1883, u bë i njohur në gjithë botën për idetë e tij revolucionare që lidhen me luftërat e klasave, të metat e kapitalizmit dhe të punës njerëzore.
Ai botoi vepra të njohura, si “Manifesti Komunist”, “18 Brymeri i Lui Bonapartit” dhe “Kapitali”.
“Paraja është thelbi i larguar i punës së njeriut dhe ekzistencës së tij, dhe kjo esencë e huaj e dominon atë dhe ai e adhuron”, shkroi ai te “Kapitali” në vitin 1867.
Shkrimet e tij u huazuan, u interpretuan dhe u adoptuan nga lëvizjet politike në mbarë botën, në vende të tilla si Rusia, Kuba dhe Kina.
Marksi e botoi “Manifestin Komunist” bashkë me Friedrik Engelsin në vitin 1848, duke e konsideruar si veprën më të famshme në historinë e lëvizjes socialiste.
Në 2018, vendlindja e tij në Trier, në jugperëndim të Gjermanisë, filloi të shesë kartëmonedha të prerjes 0 euro, për nder të 200 vjetorit të lindjes, më 5 maj.
“Suveniri vë në lojë kritikën e Marksit ndaj kapitalizmit”, tha Norbert Kaethler, drejtori i zyrës së Turizmit dhe Marketingut të Trierit, në atë kohë.
Përktheu dhe përshtati TIRANA TODAY
