Rrëzohet dekreti i presidentit Ilir Meta për ligjin e Noterisë, pak kohë pas kthimit për rishqyrtim. Komisioni i Medias ka rrëzuar dekretin me vetëm 10 vota të Partisë Socialistë.
Nga ana tjetër, PD dhe LSI votuan kundër rrëzimit të dekretit, me vetëm 3 vota, por që nuk kanë pasur asnjë vlerë.
Deputeti demokrat Enkelejd Alibeaj kërkoi prezencën e ministres së Drejtësisë, ndërsa e cilësoi të gjithë diskutimin si një teatër hipokrizie.
“Sistemi institucional ka rënë, pa Gjykatë Kushtetuese, Gjykatë të Lartë. Këtu duhet të ishte edhe ministri i Drejtësisë. Ky është teatër hipokrizie. E rëndësishme është që Presidenti ka kthyer një ligj dhe në çfarëdo lloj situate normale kjo duhet te ishte këmbanë alarmi.
Parlamenti do të duhet ta marrë seriozisht për shkak të interesit publik. Kjo është derexheja ku ka rënë institucionet. Çdo gjë është e paragjykuar. Po e ktheu Presidenti një ligj, vendos ai matanë (Rama)”, tha Alibeaj.
Ndërkohë, përfaqësuesja e EURALIUS, Agnes Bernahard tha se ky ligj mund të krijojë balancë.
Ligji u kthye muajin e kaluar për rishqyrtim nga Presidenti Meta, me argumentimin se përmbajtja e nenit 61 të ligjit “Për noterinë”, nuk është i qartë dhe në harmoni me disa nene të tjera të këtij ligji.
