Shkarkohet nga detyra ministri i Bujqësisë, Pylltarisë dhe Zhvillimit Rural në Kosovë, Nenad Rikalo. Lajmi u bë i ditur nga kryeministri i Kosovës, Ramush Haradinaj, në një postim në Facebook.
“Sot kam marrë vendim dhe kam liruar nga detyra Ministrin e Bujqësisë, Pylltarisë dhe Zhvillimit Rural, Nenad Rikalo. Rikalo i shprehi falënderim për bashkëpunim gjatë kohës sa ishte aktiv si ministër në Qeverinë e Kosovës. Në proceset politike para vetes, do të respektoj angazhimin e secilit. Ministri Rikalo ishte ministër i respektuar në Qeverinë e Republikës së Kosovës. ashkëpunimi me përfaqësuesit e të gjitha komuniteteve dhe përfaqësuesit e komunitetit serb, do të vazhdon palëkundur. RH”, ka shkruar Haradinaj.
Shkarkimi i Rikalos u vu kusht nga PSD-ja me qëllim që ta votonte Buxhetin e vitit 2019. Ministri Rikalo mori vëmendjen më të madhe pas prezantimit të ministrave të tij.
Pretendimet për krime lufte, aktivizuan Prokurorinë dhe dëshmitarë filluan të merren në pyetje. Duke tërhequr paralele me situatën ku ishte gjendur një tjetër ministër që vinte nga komuniteti serb, Aleksandar Jabllanovic, opozita nxitoi që përmes Kuvendit ta shkarkonte Rikalon.
Në debatin e ashpër në Kuvend, tetorin e vitit 2017, Rikalo ishte mbrojtur nga kryeministri Haradinaj. Mocioni i LDK-së për shkarkimin e tij, kishte marrë 27 vota pro, 40 kundër, ndërsa në fillimin e muajit nëntor, Prokuroria Speciale, bëri të ditur se nuk kishin gjetur prova të mjaftueshme se Rikalo ishte i implikuar në krime lufte.
Kurse, subjekti politik i Rikalos, Lista Serbe, pjesë e koalicionit qeverisës, është larguar nga qeveria që nga marsi i vitit të kaluar, si reagim ndaj arrestimit të Marko Gjuricit nga Policia e Kosovës.
REAGIMI
Pas vendimit të kryeministrit Ramush Haradinaj që ta shkarkojë ministrin e Bujqësisë, Pylltarisë dhe Zhvillimit Rural, Nenad Rikalo, ka reaguar Lista Serbe, duke cilësuar si Qeveria e Kosovës nuk ka legjitimitet.
“Rikalo është shkarkuar sot, sepse Lista Serbe, dhe anëtarët e saj nuk pranojnë politikë e shkeljes së të drejtave të serbëve dhe interesave të tyre”, thuhet në reagimin e Listës Serbe. Lista Serbe thonë se nga marsi i vitit 2018 janë në dorëheqje dhe se “për asnjë çmim nuk do të pranojnë të bëhen folklor dhe dekor i dikujt”.
“Qeveria e Kosovës nuk ka legjitimitet pa pjesëmarrjen e anëtarëve legjitim të popullit serb”, thuhet në reagim.
