Akademiku Artan Fuga i është bashkuar grevës që po mbahet sot nga pedagogë dhe drejtues të Fakultetit të Historisë dhe Filologjisë.
Në një postim në Facebook, Fuga shpjegon përse është në mbështetje të kësaj greve dhe bojkotimit të protestës nga ana e studentëve, teksa shkruan se refuzon që të bëjë mësim në një universitetet që kthehet në një regjim kazerme.
Më tej, pedagogu në Departamentin e Gazetarisë kritikon publikisht politikën, teksa shkruan se nuk ka kuptim që në fillim të imponohen VKM autoritare e më pas të thuhet ‘hajde diskutojmë për paktin e universitetit’.
Postimi i plotë i Fugës:
Unë sot jam në grevë,
si antar i thjeshtë, i barabartë, përtej ndarjeve departamentale, i asamblesë të fakultetit histori – filologji të Universitetit të Tiranës.
Sepse unë refuzoj të bëj mësim në një universitet që kthehet në një rregjim kazerme.
Sepse vkm e fundit janë krejtësisht në kundërshtim me frymën demokratike të një universiteti të lirë!
Sepse unë jam për një model të ri universitar shqiptar, por jo që kriza e protestave studentore të hidhet mbi demokracinë universitare.
Unë e njoh nga historia sesa sa e rrezikshme është kur pushteti bën sikur merr anën e të dobtëve dhe si zgjidhje propozon cënimin e lirisë!
As feja, as shkenca, as arti, as dija, nuk bëhet në kushte detyrimi!
Prej shekujsh Martin Luteri e ka zbuluar këtë edhe për shqiptarët !
Sot në oborrin e fakultetit histori – filologji luhet fati i intelektualizmit shqiptar për të paktën dekadat e ardhëshme.
Unë njoh të gjitha të metat dhe veset e botës universitare, një pjesë e të cilave janë të rënda, edhe për përgjegjësi të politikave të ndjekura në këto dekada. Por, unë më mirë pranoj veset e lirisë sesa “virtytet” e një diktature që prej kohësh vërtitet mbi mendjet e shqiptarëve dhe botën intelektuale shqiptare.
Vetëm bashkëpunimi forcë publike, studentë, shoqëri, pedagogë, mund t’a shpëtojë arsimin e lartë shqiptar!
Politika t’a kuptojë se nuk merr vesh fare nga administrimi i dijes dhe i shkencës, prandaj prodhon norma juridike që janë edhe më të dëmshme sesa vetë ligji i keq i arsimit të lartë!
Nuk ka kuptim që fillimisht na imponohen vkm autoritare dhe pastaj na thuhet hajde diskutojmë për paktin e universitetit!!!
Pedagogët dhe studentët nuk janë debila!
Mos i humbisni ditët dhe orët pedagogëve dhe studentëve që duhen harxhuar për dijen dhe shkencën!
Unë sot jam në grevë!
