Gazetari Artan Hoxha ka rrëfyer në emisionin “Opinion” në “Tv Klan”, momentet kur shkoi në fshatin Stjar të Delvinës, aty ku takoi Klemend Balilin dhe filmoi momentet e vetëdorëzimit në polici. Hoxha ka treguar detaje interesante rreth jetesës së tij, dhe faktit që gazetarët dhe jo vetëm e kanë cilësuar si “Eskobari i Ballkanit”. Hoxha tha se në fshatin Stjar, në zonën ku takoi Balilin, kishte një pajisje që bllokonte të gjitha valët telefonike dhe të çdo pajisje tjetër elektronike.
“Në momentin që unë kam shkuar gjatë ditës së djeshme, para se t’i afrohesha zonës, është bllokuar çdo pajisje elektronike. Aty kishte një pajisje që nxirrte jashtë përdorimit çdo pajisje tjetër.
Aty pashë që gjithë pajisjet elektronike ishin jashtë funksionit, dhe ne ishim të izoluar nga pjesa tjetër. Në momentin e parë, nuk e kam njohur kur e kam takuar. Gjëja e parë që më tha; më ke nxirrë jetën tha. Unë jam ai Eskobari. Aty ku e kam intervistuar, nuk kam pasur asnjë lloj kontakti”, tha gazetari.
Artan Hoxha shtoi më tej se ajo që i kishte ardhur ndërmend, lidhej me faktin se dorëzimi do të bëhej në banesën e tij, ndonëse u ndoq një tjetër strategji.
“Kam menduar që dorëzimi do bëhej në banesën e tij. Por gjëja që vura re është pse nuk erdhi policia ta merrte aty. Ka dalë 2 kilometra nga fshati, kanë devijuar nga rruga nacionale.
Për të shmangur vëmendjen e njerëzve, devijoi rrugën nacionale. Janë dy automjete, njëra e Ardi Veliut. Balili zbret nga makina e familjarëve të vet, hipën në makinën ‘Range Rover’ të drejtorit të policisë.
Në afërsi të Tiranës, për shkak të prezencës së mediave te Drejtoria e Policisë, kanë devijuar dhe kanë shkuar në Kombinat. Më vonë kur mediat lëvizën drejt Kombinatit, hynë te Drejtoria e Policisë së Tiranës”, përfundoi ai.
