I shumëkërkuari Klement Balili është vetëdorëzuar në Policinë e Shtetit mëngjesin e kësaj të marte. Lajmi konfirmohet për “Top Channel” nga një prej avokatëve të tij, Baftjar Rusi. Balili ndodhet në Policinë e Shtetit, së bashku me avokatin tjetër, Theodhori Sollaku.
Lajmin i pari e përcolli ish-kryeminstri Berisha, me anë të një statusi në Facebook. Qytetari digjital vinte në dijeni Berishën se Klement Balili, i ashtëquajturi ‘Eskobar i Ballkanit’, është vetëdorëzuar në Prokurorinë e Krimeve të Rënda.
Balili është shpallur në kërkim prej majit të 2016-ës, pas vendimi të gjykatës greke, ndërkohë që operacionet për arrestimin e tij në Shqipëri kanë dështuar disa herë, për shkak të dekonspirimeve.
Klement Balili konsiderohet si një prej trafikantëve më të fuqishëm të trafikut të drogës në Ballkan. Përpara se të shpallej në kërkim, ai mbante postin e drejtorit të transportit në Sarandë.
