Ish-kryeministri Sali Berisha ka publikuar mesazhin e qytetarit dixhital, sipas të cilit është vetëdorëzuar Klement Balili. Ende nuk dimë se sa vërtetësi ka lajmi në fjalë, ndërsa qytetari njofton Berishën se Balili është vetëdorëzuar në Prokurorinë e Krimeve të Rënda.
Klement Balili ishte shpallur në kërkim ndërkombëtar për trafik droge, ndërsa cilësohet nga mediat greke si ‘Eksobari i Ballkanit’.
Klement Balili i ka shpëtuar të gjitha operacioneve të organizuara nga policia për kapjen e tij. Në tetor të 2016-s, Balili i iku policisë, ndërsa ka dyshime të forta se operacionet janë dekonspiruar nga njerëz që bashkëpunonin me trafikantin e kërkuar edhe nga DEA amerikane.
Operacioni i parë për kapjen e Balilit, dështoi me dyshimet e dekonspirimit, në muajin tetor të 2016-ës, pak muaj pasi u shpall në kërkim. Uniformat blu kishin marrë informacion se një mbrëmje, Balili do të kalonte me një automjet në Qafën e Gjashtës, në hyrje të qytetit të Sarandës. Për kapjen e tij, u nis nga Tirana një grup i forcave të posaçme operacionale të Drejtorisë së Përgjithshme të Policisë, duke shmangur përfshirjen e policisë lokale.
Tentativa të tjera për lokalizimin e tij u bënë vazhdimisht, por sërish ish drejtori i transporteve në Sarandë, i hetuar nga DEA amerikane, nuk u gjet asnjëherë. Edhe gjatë bastisjeve të disa banesave ku dyshohej se fshihej, policia nuk gjeti asnjë gjurmë të tij.
Ndërkohë që emri i tij u përfshi edhe në luftën politike të vendit, në nëntor të 2017-ës, policia dhe gjykata vendosën në sekuestro resortin “Santa Quaranta” në pronësi të familjes Balili. 43-vjeçari prej më shumë se 2 vitesh vijon arratinë, ndërkohë që mbetet një nga personat më të kërkuar në vend.
