Monedhat që hidhen çdo ditë nga turistët në shatërvanin e Trevit në Romë janë kthyer në një ‘konflikt’ për Kishën Katolike dhe kryetaren e Bashkisë.
Kjo e fundit ka propozuar që paratë e mbledhura të përdoren për infrastrukturën e qytetit që është e dëmtuar, dhe jo t’i dhurohen kishës katolike, siç ka ndodhur zakonisht.
Karitas, agjencia humanitare e kishës katolike ka reaguar duke thënë se këto para mund të kishin ndihmuar shumë të varfër.
“Nuk e kishim parashikuar këtë vendim” deklaroi drejtori i kësaj agjencie duke theksuar se shpresonte që kryetarja e bashkisë do të ndryshonte qëndrim.
Ky debat ka shkaktuar shumë reagime, teksa disa qytetarë italianë i kanë kërkuar kryebashkiakes së Romës Virginia Raggi që ta rikonsiderojë këtë vendim.
Shatërvani i Trevit është thuajse 300 vjeçar dhe vizitohet nga miliona turistë çdo vit, nga i cili nxirren pothuajse 1.5 milion euro në monedha të hedhura.
