Emri i Genti Cakajt ka rindezur “luftën” Rama-Meta. Me një letër të argumentuar, Meta shprehej qartësisht se kandidatura për Ministër i Punëve të Jashtme duhet të justifikohej së pari me përvojën e duhur, gjë që mungon nga ana e Cakajt.
Në argumentet e parashtruara në letrën drejtuar kryeministrit Rama, rezulton se Gent Cakaj ka plotësuar formularin e aplikimit për certifikatën, vetëm më datë 03 janar 2019, (3 ditë pas firmosjes së propozimit për dekretim si Ministër të MPJ).
Pavarësisht nivelit arsimor, kjo nuk e toleronte aspak Cakajn që të kalonte filtrin e rreptë të presidentit Meta.
Ndonëse një filozof me detyrë të vështirë, ai duhej të ishte pajisur me certifikatë sigurie që kur kishte nisur punën.
Sikundër duket qartë dhe në argumentet e Metës, Gent Cakaj, për të marrë certifikatën është kujtuar vetëm më 3 janar, disa ditë pasi emrin e tij e kishte shpallur Edi Rama për ministër të Jashtëm.
Si për çudi, certifikata i është miratuar në kohë rekord, në datën 4 janar. Në letër thuhet se procesi i certifikimit brenda një dite, duket hapur që është një proces i kryer në kushtet e urgjencës.
