Mësohen detaje të reja nga aksidenti tragjik me një viktimë, që ndodhi pasditen e djeshme pranë bypass-it të Lushnjës.
Mjeti BMW me targa AA 858 CV ka dalë nga rruga rreth orës 16:30, në bypass-in Plug-Savër në Lushnjë. Viktima është Mirela Sakolli, 42-vjeçare, ndërsa të plagosur mbetën Majlinda dhe Bato Salia, 51 dhe 53 vjeç.
Mësohet se të lënduarit janë nga Berati, ndërsa ata po ktheheshin nga Spitali i Tiranës për në shtëpitë e tyre. Kjo pasi Majlinda Salia kishte përfunduar një vizitë mjekësore në kryeqytet. Automjeti tip “BMW X5” doli nga rruga dhe u përmbys, për shkak të shpejtësisë me të cilën udhëtonte.
Në momentin që ka dalë nga rruga, drejtuesi nuk ka mundur dot ta rikthejë kontrollin mbi të. Ai është munduar të manovrojë, por mjeti pasi ka dalë nga rruga, ka fluturuar disa metra dhe pastaj është përmbysur.
42-vjeçarja kishte ndërruar jetë në vend, ndërsa dy të plagosurit u dërguan për në Spitalin e Lushnjës, ku mësohet se ndodhen jashtë rrezikut për jetën.
