Një javë para se të ndodhte krimi makabër, 30-vjeçari afgan i kishte propozuar për martesë të ndjerës Anxhelina Petro. Ajo u godit disa herë për vdekje me shufër hekuri, mbrëmjen e 2 Janarit nga babai i saj Aleko Petro. Ngjarja e rëndë ndodhi në Korfuz të Greqisë, në banesën e të atit. Anxhelina dhe bashkëjetuesi i saj afgan kishin planifikuar martesë. Këtë detaj e ka përcjellë 30-vjeçari, teksa ka folur për televizionin grek “Skai”.
“Isha si burri i saj. I kisha propozuar për martesë një javë para krimit. Fatkeqësisht nuk mundëm”, tha ai, duke përmendur edhe disa kërcënime që Anxhelina kishte marrë nga babai i saj, por edhe dhunës fizike të ushtruar nga ai, madje dhe xhaxhai.
“Një herë e qëlloi edhe xhaxhai në shtëpinë e babait të saj. Më kërcënuan edhe mua që të ndaheshim, por dashuria jonë ishte e madhe. Ajo vajzë kishte përballuar një tirani të madhe”, u shpreh 30-vjeçari afgan.
I ati i vajzës ishte kundër lidhjes së saj me emigrantin afgan, që ishte birësuar nga një familje greke. Sipas dëshmive të pasqyruara në mediat e vendit fqinj, Anxhelina dhe i dashuri i saj bashkëjetonin prej 13 muajsh.
Aleko Petro ka pranuar krimin, dhe ka deklaruar se është penduar për atë që ka bërë. Madje ai ka kërkuar që dënimi i tij të jetë varja në një shesh publik, si shembull për të tjerët.
