Ditën e djeshme Policia e Shtetit publikoi listën me personat më të kërkuar në Qarkun e Durrësit. Mes tyre ka pasur emra të bujshëm, historitë e të cilëve janë publikuar shpesh në media.
I tillë është rasti i një amerikani pedofil, i cili ka abuzuar seksualisht me 3 fëmijë në Durrës në periudhën 2003-2006.
Bëhet fjalë për 70-vjeçarin Carl Stephan Kaminski, i prezantuar në Shqipëri me emrin e rremë David Gerard Golderstein.
Amerikani është gjykuar në mungesë dhe është dënuar me 25 vite burg, ndërkohë aktualisht është duke kryer një dënim me burg në SHBA po për abuzim me fëmijët. Historia e abuzimeve për të cilat dyshohet amerikani me të miturit shqiptarë zë fill në vitin 2003, kur ai ka mbërritur si turist në vendin tonë. Gjatë qëndrimit të tij disavjeçar në Shqipëri, Kaminski kryesisht ka qëndruar në një banesë të marrë me qira në qytetin e Durrësit, ku dyshohet të jenë bërë edhe abuzimet me tre djemtë e mitur.
Hetimet kanë gjetur se, veç abuzimit fizik, Kaminski edhe i ka fotografuar të miturit të zhveshur, duke u premtuar se do t’i fshinte fotot. Rezulton se ai është larguar nga Shqipëria në kohën që u publikua lajmi i skandalit seksual të pedofilisë në qendrën “Fëmijët e tij” në kryeqytet ndaj britanikëve David Broun, Dino Kristodulu dhe Robin Arnold, shkruan Panorama. Me herët ai është arrestuar në Gjermani, pasi udhëtonte me një pasaportë belge të falsifikuar.
Në vijim Kaminski është ekstraduar në SHBA, pasi kërkohej në këtë vend për akuza që kishin të bënin me abuzimin e të miturve. Gjatë hetimeve ndaj tij, ekspertët kanë zbuluar në kompjuterin e tij materiale pornografike me të miturit shqiptarë. Pas evidentimit të këtij fakti, autoritetet amerikane kanë vënë në dijeni Prokurorinë e Përgjithshme të Shqipërisë, që çoi në zbulimin e historisë së abuzimit me tre të miturit.
Rasti i ish-kryebashkiakut
Mes të shumëkërkuarve në Durrës është edhe Kujtim Kllogjeri, pronar i kompanisë së ndërtimit “G&Xh” sh.p.k dhe ish-kryebashkiak i Gramshit në vitet ’90. Ai është dënuar me 11 vjet e 6 muaj burg nga Gjykata e Apelit të Durrësit për “Mashtrim më shumë se një herë dhe me pasoja të rënda”.
Në kurthin e tij kanë rënë të paktën 39 persona përmes shitjes së shumëfishtë të apartamenteve. Kllogjeri ka humbur çdo gjurmë dhe nuk i dihet vendndodhja prej shkurtit të vitit 2017, raporton Panorama. Dyshohet se Kllogjeri ka marrë 2.1 milionë euro nga shitja e apartamenteve për herë të dytë apo të tretë.
