Pas grabitjes së 75 milionë lekëve, mbrëmjen e djeshme në Durrës, policia ka vënë në pranga dy policë privatë.
Të arrestuarit janë F.S. 46 vjeç dhe A.Gj. 55 vjeç, të cilët akuzohen për shpërdorim detyre. Dyshohet se ata nuk kanë vepruar në mënyrën e duhur gjatë grabitjes së automjetit të blinduar që po transportonte paratë e Ndërmarrjes së Drejtorisë Rajonale të Transportit të Durrësit.
Tre persona të armatosur e të maskuar grabitën makinën e sigurisë private dhe nën kërcënimin e armës morën 75 milion lekë të vjetra. Policia vijon punën për kapjen e autorëve të dyshuar.
Njoftimi i policisë:
Specialistët për Krimet në Komisariatin e Policisë Durrës kanë arrestuar në flagrancë shtetasit:
•F.S. 46 vjeç, banues në Durrës, punonjës në shoqëri sigurimi private ;
• A.Gj. 55 vjeç, banues në Durrës, punonjës në shoqëri sigurimi private.
Shtetasit e mësipërm janë arrestuar pasi dyshohet të kenë konsumuar veprën penale”Shpërdorimi i detyrës” ku ditën e djeshme, në lagjen nr.14 Shkozet dyshohet se 3 persona me një mjet, nën kërcënimin e armës dhe të maskuar i kanë dalë përpara një mjetit (shoqëri private sigurimi) që po trasportonte lekët e Ndërmarrjes së Drejtorisë Rajonale të Transportit Durrës në një bankë të nivelit të dytë dhe i kanë marrë një shumë parash.
Vijon puna për kapjen e autorëve të dyshuar.
