Studentët e Fakultetit të Inxhinierisë së Ndërtimit dhe Fakultetit të Arkitekturës dhe Urbanistikës, kanë bojkotuar sërish mësimin, ndërsa janë shprehur kundër tarifës për provimet që jepen me kredite.
Me mijëra studentë kanë rrethuar Ministrinë e Arsimit, ndërsa kërkojnë ministren e Arsimit. Ata nuk pranojnë që të futen brenda ambienteve të Ministrisë, pasi sipas tyre, çdo kush që hyn aty mund të kërcënohet.
Nëse nuk merren parasysh kërkesat e tyre, ata kanë bërë thirrje për revolucion studentor. “Revolucion studentor. Revolucion studentor, revolucion studentor, ne nuk jemi bankomat, nuk tërhiqemi”, “Jo negociata me ministren arrogante dhe injorante”, janë disa nga thirrjet e tyre.
Përfaqësues të Ministrisë së Arsimit, janë përpjekur që të diskutojnë me ta, por ka qenë e pamundur, pasi nuk kanë pranuar të futen brenda Ministrisë së Arsimit.
“Dilni jashtë”, “Duam ministren”, ”Anulo vendimin”, “Mbani përgjegjësi”, janë disa nga thirrjet e studentëve, drejtuar Ministrisë së Arsimit.
https://tiranatoday.com/tarifat-e-shkollimitstudentet-bojkotojne-mesimin-marshojne-drejt-ministrise-se-arsimit/
