Banorët e Astirit po hyjnë në muajin e dytë të protestës dhe duket se nuk kanë ndërmend të tërhiqen nga vendimi i Bashkisë. Duket se banorët e Astirit janë frymëzuar nga protestuesit e Francës, teksa sot në ditën e 30-të të protestës, ata mbanin veshur një jelek ngjyrë portokalli.
Ata kanë kërkuar dëmshpërblim me vlerën e tregut për banesat e tyre, teksa thërrisnin e fishkëllenin si një formë proteste kundër qeverisë.
Me thirrje ‘jug e veri, jemi një’ dhe ‘turp, turp’, banorët kanë bllokuar edhe sot rrugën kryesore.
“Jemi me të drejtën e fëmijëve tanë. Të gjithë kemi të drejtat tona dhe të gjithë paguajmë taksat. Duam të drejtën tonë dhe të bëjë çfarë të dojë. Nuk jemi kundër projektit, por duam djersën tonë,”– u shpreh një qytetar.
Ata kërkuan nga Rama e Veliaj që të mos shkelin mbi djersën e tyre, ndërsa thonë se ata po provokohen teksa u është ndërprerë uji.
Të pranishëm në protestë kanë qenë edhe deputetët e opozitës, mes tyre Klevis Balliu dhe ai i LSI-së, Brahimllari.
