Taksimi 100% për mallrat serbe mund të anulohet vetëm në rast se Serbia vendos ta njohë Pavarësinë e shtetit të Kosovës. Kështu deklaroi sot kryeministri i Kosovës, Ramush Haradinaj pas takimit që zhvilloi me Komisionerin për Politika Evropiane të Fqinjësisë dhe Negociata të Zgjerimit, Johaness Hahn.
“Ne jemi të gatshëm të nënshkruajmë marrëveshje me Serbinë, ku do të përfshihet edhe Marrëveshja me Treti të Lirë me Serbinë”, theksoi ai.
Më tej, shefi i qeverisë së Kosovës deklaroi se nëse ka nevojë për barna dhe ilaçe, qeveria që ai drejton nuk do të bllokojë në asnjë moment kalimin e tyre drejt Serbisë.
“Nëse Qeveria e Kosovës ka informata se ka ndonjë krizë të ndonjë produkt vital, ne jemi në gjendje t’i furnizojmë. Spitalet apo ambulancat, nuk do të ju mungojnë ilaçet, për të gjithë. Do të respektojmë vendimin e Qeverisë, dhe ky vendim mund të anulohet me rastin e njohjes së Pavarësisë së Kosovës nga Serbia. Ne do punojnë që tani për një marrëveshje gjithëpërfshirëse, për borxhet, të zhdukurit, të drejtat e komunitetit serb në Kosovë e plotë tema tjera e një nga to do të jetë edhe tregtia e lirë mes Kosovës dhe Serbisë”, tha ai.
Ai është shprehur se ka shpresë se çështja e vizave për Kosovën do të futet në agjendën e Këshillit të BE-së. “Këshilli ka mbledhje në çdo tre muaj. Nga BE-ja është një skepticizëm, ata japin shumë arsyetime, prej atyre që kjo është e logjikshme, se thonë se me Ukrainë e Gjeorgjinë ka zgjedhur një vit e gjysmë periudha kohore mes Komisionit dhe vendimit. Nuk përjashtohet që në një të ardhme të afërt, sepse Këshilli mblidhet çdo tre muaj, mirëpo nuk na japin një garanci se do të ndodh kësaj here”, deklaroi Haradinaj.
